必睇！加拿大日常購物慳到盡

話說小編平時好鍾意行超市，經常會認得邊樣產品今日有折而邊樣無，自認有師奶心態嘅我，當然要同大家介紹下加拿大嘅購物攻略，送啲貼士俾大家！

貼士1：留意節日優惠

香港超市的產品優惠出現得較頻密，而且係按個別產品做優惠，大家都應該經歷過等多幾日就會減價嘅心態。相反，加拿大百貨公司或大型超市會偏向推出季節性/ 節日優惠，例如感恩節、聖誕節、黑色星期五等，而好多時會全場推廣有同一個折扣優惠。因為相隔幾個月先有一次大型折扣，所以好多人都會提早排隊，情況就似香港SOGO感謝祭。

貼士2：留意會員制、分店/地區優惠

加拿大有唔少大型超市，例如Real Canadian Superstore、Costco、Walmart、T&T Supermarket（華人超市大統華）等，大部分超市都可以登記做會員儲積分。以Costco為例，以會員制去經營，需要每年繳交會費，成為會員先可以購物。當然會員享有相對便宜嘅優惠，每年有一定程度嘅消費額必定可以回本，所以申請會員果陣記得要衡量一下自己嘅購物習慣！部分超市亦會推出限時優惠，好似大統華超級市場喺官網會列出各地區/各分店嘅限時優惠。只要定期留意下官網，就可以買到至抵產品啦！

貼士3：留意優惠券（Coupon）

加拿大超市嘅產品價格唔似香港經常調整，看似好少減價，但小編發現咗一樣慳錢方法—優惠券。原來商店會習慣發放各種嘅優惠券吸引消費者購物，你可以留意商店貨架旁有冇coupon提供。如果登記咗做會員，商店會定期郵寄宣傳單張，同時會夾雜住coupon寄俾你，提醒下你嚟緊嘅新優惠，又係時侯去shopping啦！習慣網上消費嘅朋友可以發掘一啲coupon網站或者購物優惠App，可以將coupon列印出嚟又或者直接使用coupon code。記得使用優惠券之前，留意清楚優惠券嘅限期同條款，換取coupon嘅同時亦要保護好個人資料呀！

如果想喺加拿大慳多啲就要花時間做足功課，不妨得閒Loop下官網或者留意下經常光顧嘅店舖嘅優惠模式，咁喺加拿大都可以做個精明嘅消費者！