2023年最新加拿大熱門職業 貨車司機人工高門檻低？

當Work From Home已經變成常態嘅時候，就業市場都因為咁而有好大變化～加拿大最近就公佈咗2023年嘅熱門職位，其中一個就係貨車司機，今日小編就想同大家講下點解貨車司機需求咁大？又多唔多新移民去做？真係人工高福利好門檻低？

點解貨車司機需求越來越大？

根據Trucking HR Canada 今年1月最新報告，貨車司機職位空缺創歷史新高達20,200個。當中安省有6,080個職位空缺，佔加拿大所有貨車司機職位空缺嘅26.4%，其次係BC省有4,280 個和艾伯塔省有3,925 個。

依家各行各業都依賴交通運輸系統去將原材料、消費品運送到唔同地方，本身貨車司機喺加拿大都已經長期短缺，尤其疫情之後，需求更大。再加上多倫多不少企業增長速度快，令當地貨車司機需求持續增加。貨運價格被提高，所以點解來貨貴，整體物價又會貴咗。情況就好似早前香港跨境貨車司機受疫情影響而停工，導致大家買餸菜嘅價錢都上漲。

人人都話貨車司機人工好高？

按照招聘網站Glassdoor上最新工資行情，加拿大貨車司機平均年薪 6萬2千加元 (約港幣37萬)。加拿大貨車司機人工高、工作較穩定嘅同時，自然工時亦相對較長。去到加拿大要喺貨車司機培訓學校上堂後先可以正式返工，所以要有心理準備，剛到埗有段時間要訓練，唔會即刻返工揸貨車住。而培訓時間長短要視乎省份同培訓學校，每個省都有不同規格同條例，如果有興趣可以聯絡我哋了解多啲！

當地請好多新移民做貨車司機？

沉悶而工時長難以招攬年輕一輩，所以加拿大政府希望透過推出移民政策吸引更多新移民以填補當地勞動力市場缺口，而引入貨車司機喺當地會被視為技術引入。同時，大貨車司機獲豁免勞動力市場影響評估 (LMIA)，所以喺請非本地人上較少限制，令當地僱主有好歡迎外地人同新移民！ 部分省份更推出雇主擔保計劃，只要符合資格申請並累積工作經驗就可以移居到加拿大，成為永久居民，真係一舉兩得！貨車司機基本要求只需要年滿18歲、識基本英語溝通、持有合資格駕駛執照就可以，糧期準又有法例限制工時，所以司機福利都相對有保障。

加拿大就業市場有別於香港，可能你唔為意嘅工種其實有好大發展空間，希望大家開放眼界了解多啲，唔好錯過啱自己嘅工作機會啊！