加拿大圖書證係落地好幫手？

唔知大家喺香港多唔多去圖書館呢？小編有時都會去自修室嘅，香港嘅圖書館不外乎都係借還書，睇下報紙咁，不過近年就越來越少人去。如果你以為加拿大都係一樣嘅話，咁你將會錯過咗好多嘢！ 🤩 以多倫多公共圖書證為例，圖書證除咗用嚟借書、借CD同DVD之外，仲可以用嚟print文件🖨️！點解print嘢喺個邊顯得咁重要？想知道就要睇埋落去喇！

影印文件

一落地通常要print好多文件🗂️去處理各項嘅申請，又或者去搵工嘅時候又要print CV，甚至有時連喺Amazon買嘢退貨都要print receipt，呢啲時候圖書證就可以幫到你。當你完成申請圖書證之後，你可以喺屋企upload要print嘅文件上自己個account，然後去圖書館用返圖書證登入番就可以print，係咪好方便呢，咁就唔使特登買Printer喇！

免費通行證

最令小編興奮嘅係，有圖書證嘅朋友仔係可以免費拎博物館+藝術通行證 (Museum and Arts Pass, MAP)。你可以用呢張通行證喺限期內免費參觀多個博物館、美術館🎭、科學中心甚至動物園，真係好抵！

免費教學資源

除此之外，多倫多公共圖書館內仲有一個創新中心，只要註冊咗帳戶就可以免費上佢哋嘅堂，課堂內容好多元化，關於電腦🖥️ 有網頁設計、平面設計等，又有關於藝術嘅課堂，仲有讀書會📖添，啲活動多到小編都列唔曬！各位朋友仔要留意每個圖書館都有唔一樣嘅服務，申請圖書證之前不妨上網睇清楚！

申請圖書證程序好簡單

申請多倫多公共圖書證只要提供身份證明文件就可以申請，例如安省健康卡、安省照片卡、駕駛執照等。如果冇以上文件都唔駛擔心，只要出示番有自己姓名同地址嘅文件就可以，例如出生證明、信用卡、賬單等。多倫多公共圖書證每年都要續證，到期前記得喺網上或者親身去圖書館更新喇！其實當地圖書館使用率都幾高，畢竟佢地提供嘅服務多元化，總有一樣啱你嘅，申請定就無有怕喇！😎

資料來源： 多倫多公共圖書館