《加拿大留學須知！PGWP畢業後工作簽證六大常見迷思》
呢排有唔少想去加拿大留學嘅朋友仔都會問我地關於畢左業之後，如果想留係加拿大做嘢應該點部署。其實如果大家報讀嘅課程係公立College或者大學嗰度讀嘅話，都可以畢業之後申請一個畢業工作簽證(Post-Graduation Work Permit, 簡稱PGWP)，今次小編就帶大家探討吓PGWP嘅六大常見迷思，俾大家知多啲如果想申請PGWP要注意嘅事項!
要滿足咩條件先成功申請到 畢業後工簽 ( PGWP )?
申請 Post-Graduation Work Permit (PGWP) 嘅年齡要滿18歲或以上。
你要係加拿大全職學生身份，修讀嘅課程至少要長達8個月，期間唔可以輟學或休學。
畢業嘅學校要係加拿大公立大學或公立學院，或者係私立學校嘅學士、碩士或博士學位要經過各省政府認證。
學校出嘅畢業證明或成績單，證明你已經完成所有課程，滿足畢業需求。
學校正式通知你完成學位要求嘅當日開始計算180日內申請 PGWP。
申請嘅時候，你要有有效嘅學生簽證 (Study Permit)。
PGWP 必需要申請成功後才可以工作？
唔係呀！其實你可以喺畢業後180日內提交申請。但係我哋建議留學生應該儘早提交申請，因為申請過程通常長達80-180天，而你申請過程期間都可以係加拿大搵工同做嘢 。
點樣知道申請嘅PGWP 有效期有幾耐？
PGWP 嘅有效期係由你嘅課程長度決定，最長有效期為三年。
修讀大於八個月但少於兩年嘅學生，PGWP嘅有效期限相等於佢哋嘅課程長度。
如果修讀嘅課程時間係一年，申請嘅PGWP有效期限亦係一年。
如果修讀嘅課程時間係兩年或以上，PGWP嘅有效期限「最長」係三年。
PGWP 一定要喺加拿大境內申請？
唔係呀！你可以畢業之後係任何地方提交申請，包括係加拿大境外。不過，如果你係加拿大境外申請，就需要證明你喺當地係合法居留嘅。
PGWP 只可以喺特定嘅公司工作？
唔係呀！PGWP 允許你係加拿大任何公司工作，包括自僱。如果你想自己做生意，咁就要申請自僱人士嘅工作簽證。
PGWP 過期咗就一定要離開加拿大？
唔係呀！如果你遇到特殊情況，例如健康或家庭原因，可以申請延長簽證。不過，如果你嘅簽證過期咗，而你又冇申請延期，咁你就要離開加拿大啦!
