加港消費比較 - 🇨🇦加拿大買車差唔多平香港一半？🚘

最近，身邊好多朋友都陸續移居外地。

其中一位朋友A👨🏻已經身處英國，係IG睇到佢已經安定落嚟，而且仲添置咗一部歐洲車🚗代步。

分享咗呢件事俾香港身邊嘅朋友之後，唔少人都有同一個反應，「佢好有錢架咩？」🤔

於是，我發現咗原來喺香港生活，或多或少都有啲奇怪嘅錯覺，就比如歐洲車係比較有錢嘅人先會選擇。

其實朋友A👨🏻買果部車🚗，有「英國Jazz」之稱，係二手市場其實幾萬蚊港紙就有交易。而且歐洲地方買歐洲車，點都會平啲，起碼當地有設廠房，成本已經低好多。

喺香港買車比外地貴，原因有好多，其中一個係香港汽車需要收嘅稅💰相比外地的高，就算外地會收銷售稅，全新車嘅價格都比香港平一截。再加上政府今年上調咗私家車的首次登記稅及牌費，分分鐘買架車的稅項仲貴過架車的零售價。

就以 BMW M340iA 為例，香港的零售車價係港幣$481,395， 計埋首次登記後就要成$888,000，差唔多貴左成一倍。但係加拿大的零售車價係加幣$52,000（即約港幣$332,800），連埋13%銷售稅同其他雜項，都係大約港幣$400,000，足足比香港平成一半。😱😱😱

加拿大買車平均都會係香港嘅六折左右，所以如果大家見到加拿大出現名車，其實無你地想像中咁貴。當然，汽車對外國人嚟講相對上係一樣必需品，當地原油價格都會係一般人可以負擔嘅水平，但都叫做可以有個揸靚車既目標俾自己呀！