員工福利 - 放工後唔使再收老闆電話？

香港自從有WhatsApp嘅出現，有啲上司就好似預咗打工仔要24小時on call咁，而加拿大出咗名重視Work-life Balance，最近安省仲立法規定員工放工後有權唔回覆上司電郵、電話！

安省有法律規定僱主唔可以喺放工時間聯絡員工？

加拿大因為疫情嘅關係，大部分上班族都轉做Work From Home，但正因為呢種模式，返工同放工嘅界線變得模糊，令到員工更難喺工作同生活之間取得平衡。所以，安省宣布正式實行《工人工作法案》 （Working for Workers Act），規定擁有25名或以上員工嘅僱主需設立有關書面政策，例如員工放工後可以選擇不回復工作電子郵件和通知等，以確保自己有足夠時間同家人相處。除此之外，規例亦著重改善工人基本權益，例如要求企業允許送貨工人喺送貨或取貨時可以使用公司洗手間等等。希望可以透過規例保障員工嘅生活質素，提醒大家除咗工作以外，同家人朋友相處嘅時間都非常重要，希望僱主提供充足啲私人空間俾員工喇！

加拿大以外嘅國家都有實行同類政策？

其實除咗加拿大之外，葡萄牙最近都通過「在家工作勞動法」。若果僱主喺放工時間以電郵、電話等方式聯絡員工，違例者會被罰款。另外，當地公司亦要支付Work From Home嘅額外費用，例如電話費及上網費等。可見越來越多國家著重Work From Home帶嚟嘅潛在影響，希望僱主同員工們都可以喺工作同生活上取得平衡，做到真正嘅Work-life balance！