移民不是搬屋

移民係一回咩事？接觸過好多香港客戶，佢地都好希望移民可以好似搬屋咁，搭一程十幾個鐘車，去一個遠啲嘅地方，間屋住大啲，最好無咩其他嘢需要改變。今次用幾個經常收到嘅問題去同大家分享一下心態上嘅調整。

「唔識英文可唔可以移民加拿大？」

可能有啲客戶會聽到人講，有啲城市全部人都講廣東話。的確，以列治文為例就係一個九成人講廣東話嘅城市。首先，當你去一到咁大嘅國土，都會希望可以去遊山玩水，唔會甘於以後都困住喺一個城市呱？

「有咩地方唔凍？」

香港係位於亞熱帶地方，只要你唔係沿著赤道選擇移民國家，都會係比香港凍。好似香港人好鍾意去嘅日本、韓國，比較近嘅國家，已經凍過香港好多。 好多香港人聽到會零度或者負度數就嚇親，但其實大部份時間出出入入都係有暖氣嘅室內地方。

「果邊啲稅好高，有無方法俾少啲？」

之前有提及過稅務嘅概念，傳送門： https://www.facebook.com/....../274871357229359/...... 其實都係番返去權利與義務嘅概念，假如你去到加拿大，所有嘅福利都申請的話，你果年要交嘅稅自然會高啲啦。倒轉咁講，當你喺工作時交嘅稅有幾多，退休時得到嘅保障亦都會反映返出嚟。

「拎咗退休金仲駛唔駛住喺加拿大？」

當如果你覺得，一啲國內有樓人士嚟香港拎綜緩係呃香港嘅時候，又何必變成佢呢？同埋好重要，唔好做一個令別人國家討厭嘅人，尤其係香港人都係十大被討厭民族之一嘅時候，做好自己，唔好嘗試挑戰人地法律。

以上分享係經常遇到嘅客戶疑問。通常佢地個心態都係好一致，點樣可以將現時香港嘅生活搬到加拿大，越少要變化就越好。呢類客戶聽完我地一一解答之後好多時都會不了了之，甚至乎流程同價錢都唔洗問。似乎佢地都未知道自己需要作出幾大付出，去進行移民呢件事。 移民就係移居去另一個國家，做當地國民，融入同適應係必須。 如果你希望咩都唔變，淨係間屋平啲大啲，你只係暫住第二度嘅香港人，咁就唔好諗點樣拎其他國家嘅福利。