點解要去到加拿大先買羽絨嘅3大原因

上一篇講到加拿大今年可能提早步入冬季，為咗幫大家可以喺加拿大過返個暖笠笠嘅冬天。以下，小編就為大家整理出三個重點，分析一下點解大家去到加拿大先買羽絨，同時了解下加拿大羽絨同香港羽絨嘅分別。

1. 加拿大羽絨著重物料

對於加拿大人嚟講，羽絨係佢哋冬季嘅必需品，相反香港嘅冬天，著羽絨嘅日子寥寥可數，所以好多時除咗戶外運動牌子之外，普遍香港羽絨嘅保暖度都唔太高。另外，大家喺揀選羽絨嘅時候，可能會聽過Fill-power(FP，蓬鬆度)，簡單而言，FP數字越大，羽絨蓬鬆度越高，保暖程度就越高。著名加拿大本地羽絨品牌Moose Knuckles嘅羽絨唔單止防風防雨，而且FP數字最少600起跳，但相比起香港市面上嘅羽絨，物料會以聚酯纖維為多。

2. 加拿大羽絨價錢較便宜

加拿大羽絨需求多，供應量自然多，所以對比起香港買羽絨，當地羽絨嘅價錢會較平！以Canada Goose為例，小編就幫大家計過數，加拿大羽絨嘅售價計埋銷售稅後都仲平過香港大概2至3成！唔單止可以慳翻啲錢，又可以慳埋行李位，當地選擇又多啲，一舉幾得！

3. 加拿大羽絨款式較多

加拿大人著羽絨唔係淨係著幾日，而係著幾個月，無理由日日都著同一件嘅，所以好多人都會買多幾件旁身。加拿大羽絨款式由顏色鮮豔去到樸素嘅款式都有，想時尚啲又得，戶外運動時用都得，好似加拿大品牌Mackage就有推出滑雪衣。款式多到小編都怕大家會有選擇困難症！

其實買羽絨除咗睇產品本身之外，亦要留意你居住嘅地方，例如溫尼伯(Winnipeg)有機會去到零下三十度，而溫哥華(Vancouver)多數都係幾度左右，所以買之前記得留意清楚居住地區嘅氣溫，從而揀件適合嘅禦寒衣物。希望以上資訊可以幫到大家準備嚟緊嘅冬天啦！