唔想去到多倫多變「路痴」？教你一招分清東南西北🧭

香港地方細、街道短可能行得多都會記得路線，但去到多倫多可能睇住個路牌都未必識行。如果好似小編自問喺香港已經係一個路痴，咁就一定要記住呢條「中央嘅街」—Yonge Street 去幫你認清方向。

最緊要記住Yonge Street（央街）

如果你打算去多倫多生活就一定要記住Yonge Street (央街)，因為Yonge Street 係貫穿整個多倫多最主要嘅道路，亦都係多倫多最長嘅一條街。簡單啲講，Yonge Street 喺多倫多中央由南至北方向形成咗一條主軸，將多倫多大致分為東面 (E) 同西面 (W)，咁樣記住方位就容易得多啦！👍🏻

點解分清方位咁重要？🧭

因為多倫多道路規劃係用東南西北方向去界定，橫跨Yonge Street 嘅大街會列明係東邊定西邊，例如Bloor Street East 、 Bloor Street West。另外，多倫多地鐵站出口唔似香港咁樣分A/B/C 出口，而會用方位去指示路線，就好似下圖嘅照片指向North同South。

街道位置記緊要「精準」

多倫多一條街可以極長，如果你約朋友仔淨係話俾人知係Yonge Street 等咁就慘喇，因為Yonge Street 由多倫多（Toronto）一直延伸去到紐馬克特（Newmarket），你朋友都真係唔知點搵你好啦😅！所以喺多倫多呢度話俾人知你位置，係要用橫街加直街去講清楚，例如Sheppard Avenue 係橫街，Yonge Street 係直街，咁Sheppard Yonge 就係指果個交界個Block 喇！其實你仔細留意下有部分🚇地鐵站名都係咁樣標示架！

加拿大雖然大街小巷比較多，到埗之後又會人生路不熟，希望小編呢個小技巧可以幫到大家。另外，下列小編幫大家整合咗最常見嘅路名縮寫，方便大家睇地圖🗺果陣唔會變到一嚿雲咁樣啦！