Search
燈位期間㩒手機 會即時吊銷牌照？
喺香港揸車最常收到嘅罰單就係「牛肉乾」（違例泊車），但喺加拿大最容易收到嘅罰單竟然係「分心駕駛」（Distracted Driving)。因為你喺不自覺嘅情況下已經違規，就連揸車等緊紅綠燈期間㩒手機都已經係違規！ 如果你仲未攞到G牌，最嚴重仲會即時吊銷牌照！
何謂「分心駕駛」 (Distracted Driving) ?
加拿大各個省份、地區對「分心駕駛」嘅違規行為都有少少唔同，但同樣都係針對駕駛人士冇完全集中精神係行車路線上。安省嘅「分心駕駛」條例主要針對駕駛人士喺揸車期間（包括駕駛中或燈位等候中）使用電話或者Send短訊，而BC省就列出整理個人儀容同搜索音樂都屬於「分心駕駛」嘅行為。
千祈唔好以為冇清楚列出嘅行為就代表冇違規，其實所有分散你注意力嘅非駕駛行為，一律都有機會被視作為「分心駕駛」。除咗同手機相關嘅行為之外，仲有好多行為都會影響駕駛而被視為違規，例如吸煙、飲食、同乘客傾偈等。最近流行視像會議，甚至有人一邊揸車一邊Zoom video call，小編不得不佩服大家咁善用時間。
「分心駕駛」的違規處罰
各個省份、地區所訂立嘅處罰都唔同，而安省嘅處罰係全國最嚴厲，除咗會罰款、記分，甚至會吊銷牌照。下列圖表就簡單列出咗安省持有A到G牌嘅司機違規嘅處罰：
如果你係持有G1、G2、M1 或 M2車牌而違規，罰款係一樣，但就冇記分，反而吊扣牌照嘅時間就會更加長：
首次違規須吊扣牌照30日
第二次違規須吊扣牌照90日
第三次違規須吊銷牌照
又要罰錢、又要吊扣牌照、車保仲有機會會貴啲，大家都係乖乖遵守規則啦！如果大家避免唔到要接聽電話或者處理其他事情，建議大家駛開行車道，停留安全嘅地方處理好曬先再出發。小編提提大家喺加拿大揸車平均車速都唔算低，為人為己，大家最好都係專心揸車啦！
Comments